|
اشعار - احاسيس دافئة
ماتفرحشي
مين انت عشان فـ بعادك يتوه قلبي و يتأثر ماتفرحشي اوي بعنادك مسيرك يوم هتتحسر و تشكي للجماد و الخلق لحد ما الكلام فـ الحلق يضيع منك و يتبخر و تندهلي بكل الشوق إرجعلي انا المحقوق دي غلطه و مش هتكرر صحيح انا قلبي يوم حَبَك و كانت دنيته حُبَك و فيك عمره ما استخسر لكن ما اقبلش اكون عاجز اصاد غَدرَك و اقول جايز هيجي يوم و يتغيّر خلاص لازم كده تفارق و اشوفك فـ الدموع غارق و فيك انا عمري ما هافكر |
برواز الماضي
اخر حاجه كنت اعقلها او اصدقها و اتخيلها اني اتغير فجأه عشانها و اخرج من برواز الماضي و القا حياتي .. هى حياتها صحيح مستغرب !! مانا يامه حاولت و كل ما اقرب القا سدود الدنيا فـ وشي اقول معلشي .. لسه حكاية حبك ليها سابقه اوانها .. انا دلوقت خلاص مش خايف مغمض عيني .. و بقلبها شايف فرحة عمري .. حاضنه كيانها خلاص راح اقولها بعلو الصوت بحبها موووت و امسك ايدها و اشوف فـ عينيها عيوني بتضحك من فرحتها بس خساره بافوق م النوم و يوم ورا يوم نفس الحلم بيتكرر اتاثر و اتحسر .. و اشرب من فنجان حزني شفطه و انام .. اصل انا واخد ع الاحلام |
كم من صديق باللسان وحينمــــــــــا ****** تحتاجه قد لايقوم بـــــــــــــــواجب
ان جئت تطلب منــــــه عونا لم تجد ****** الا اعتذار بعد رفع الـــــــحواجب تتعثر الكلمــــــــــــــــات في شفتيه ****** والنظرات في زيغ لأفق ذاهـــب يخفي ابتسامته كـــــــــــــــأنك جئته****** بمصائب يرمينه بمـــــــــــصائب والصحب حولك يظهرون بـــــــأنهم ****** الأوفياء لأجل نيل مــــــــــــآرب واذا اضطررت اليهمو او ضـــــاقت ****** الأيام مالك في الورى من صاحب جرب صديقك قبل أن تحتــــــــــاجه ******ان الصديق يكون بعد تجـــــــــارب أما صداقات اللسان فـــــــــــــــانها ******مثل السراب ومثل حلم كــــــــــاذب |
لكل فعل رد فعل
و رد فعلي لما قولتي ان قلبي و كل حبي اصبحوا شيء ممل رد فعلي كان بِـ غِل غِل جرحي لما فرحي مات اصاد عينيكي و انتي فوق الامي و انهزامي م السعاده زرعتي فل رد فعلي كان بِـ غِل مش حزين ع اللي عملته فيكى و الالم اللى سيبته فـ حضن قلبك و اهو من نِفسِك تعرفي ايه معنى ذل رد فعلي كان بِـ غِل |
كفايه دموع
انا اول .. و اخر ضوء فـ لياليكي انا نبـض الامـل فيكي انا احلامـك السارحـه و بسمة ناي غناويكي انا دارك و مشوارك انا عطشك و انهارك انا توب الحنان لما توب حـُزنك يغطيكي ايه معنى الحياه و انتي على حدود الالم تايهه مانيش عارف لو موتّي اعيش ازاى ولو ثانيه كفايه دموع ارجوكي دموعك دي بتقتلني و عيبه فـ حقي لو اغني على جراحك و اعيش مبسوط يموت الكون ده لو شافك حزينه القلب محتاره شريده فـ رسم اوصافك و م اللى خانوكي منهاره ماددلك يدي بالتوبه ذنوبي عكرت ارضك خلاص سامحيني دي النوبه و هتسامحي مانا عارفك بريء قلبك كده صافي و مستني تضميني و تحميني فـ وقت جنون ماليش غيرك فـ كل الكون انا ليكي و بيكي هكون |
حلاوة روح
برغم فراقنا عندي طموح و بضحكلك و انا مجروح و خايف يا حبيبي لاكون بعافر فـ حلاوة روح انا عندي امل نرجع اكيد لبعادنا ده نهايه حبيبي بندهك .. اسمع ندا قلبي و هوايا انا كاتم حزني جوايا و منايا لو مسموح نعيش مع بعض من تاني عينيك بجد وحشاني فـ اي زمان و فـ كل مكان معايا ... منين مابروح |
امتى هنفك القيود
الشياطين سكنوا الجنه و الملايكه محرومين لا و الاصعب يا اخوانا كدبهم مصدقين فرحانين بالخراب متجرعين مر و عذاب و اللى فينا قلبه تاب يحسبوه م المجرمين عيشنا ليه مليون متاهه و ف غباءنا مسجونين فكرنا ان الدنيا غابه تحت حكم متقين امتى هنفك القيود امتى هيكون لينا صوت امتى مش هنخاف نموت لجل حق مُستَبين |
و إيه يعني
و إيه يعني ما دام حبيت يشوف قلبي عذاب فـ هواك انا اخترتك و بيك حسيت و عمري نفسي اعيشه معاك و مهما عذابي بيك يكتر هعيش و هحب فيك اكتر و شوقي كل يوم يكبر و مش هنســــــــــــــــاك و إيه يعني ما بينا حدود و صعب فـ يوم نتلاقى مابين قلبك و قلبي وعود و حاجات جوانا مشتاقه فـ احلامنا بتسبقنا تِخلي لحبنا معنى تِضم قلوبنا تِسعدنا و رغم بعادنا نتلاقى |
الشاطر فينا
القلب العاشق لالامه بيعافر احساس بالموت و يسافر سكة احلامه على مركب مسجون فـ تابوت متغرب دايما عن نفسه و بيعشق عيشته فـ سكوت و إن جه يوم حب و راح بايسه على خده يحزن و يموت و القلب العاشق لغرامه بيطبطب على خد الجرح و يسافر سكة احلامه مِتزوّق بسعاده و فرح متغرب دايما عن المه و بيعشق عيشة الافراح و إن جه يوم حب و راح بايسه على خده يهدا و يرتاح ده الفرق ما بين القلبين لاتنين عايشين جوه حياتنا و الشاطر فينا و رزين هو اللى هيقدر لو فاتنا قطر الاحلام مش هيسيبه هيجيبه و منه هيختار القلب اللى هيلقى حبيبه و يكمل بيه المشوار |
الشوق المعاند
من سُهاد ليلي اللي شارد بين نجوم حُبِك و حاير بغزل الشوق المِعاند من بحور شعرك ضفاير من طريق مشتاق لنور وسط عتمة الغياب برسم الاشواق بحور ليكي و ابعتها فـ جواب ايوه صورتك مش ناسيها جوه قلب القلب ساكنه جوه حلم الحلم ليها مركبه و مجداف و مرسى قولتي راجعه .. قلبي صدق و ابتدا يعد الثواني كل ثانيه فيها يغرق وسط امله بالاماني امتى هسمع صوت غُناكي جوه حُضني بيناديني امتى ترجع لي حياتي و التقي صورتك فـ عيني |
حبي الوحيد
يا بسمه بتوعد قلبي و تسعد حياتي اكيد يا حبي الوحيد يا كُلي انا بحبك و حالف عمري ماخالف فـ حُبِك يا عمري شرع الهوى معاكي يا عمري هعيش كل عمري و احلام هوانا نحققها سوا حُبِك حكايه اجمل حكايه ساكنه فـ قلبي شوقي و حُبي و كل المُنى |
دُنيتي
دُنيتي من غير عينيها تِسوى ايه يا ناس قولولي لمسه واحده من ايديها بعدها راح تعذروني ولا تنهيدة رموشها فوق عينيها السرحانين تِكسر الاحزان تحوشها عن قلوب العاشقين تِرسِم الاحلام حقيقه تِنده الضِحكه البريئه تِسبق الشمس تلاقيها نور بيضحك ع الجبين حُبها فـ القلب راسِم دنيا اجمل م الخيال دنيا لون سمار عينيها دنيا تِهزم المُحال دنيا فيها قلبي راضي مش مخاصِم او مِعادي قلب عشقه رزين و هادي قلب عاشق للجمال دُنيتي و حياتي هي حِسوا بيا و صدقوني طب شوفوها بنور عينيا بعدها راح تعذروني |
بتلوميني
بتلوميني على شيء عملته غصب عني عشان ارضيكي بتلوميني و انا ايه ذنبي نفترق و انا روحي فيكي ما تجرحيش اللى باقي مني و احنا فـي لحظة فراقنا و اوعديني مهما تحبي مش هتنسي ازاي بعدنا و ان انا ضحيت بقلبي عشان اشوف فرحة عينيكي مركب الاحلام بتغرق و قلبي متعلق فيها مكتوب عليا اعشق سكتك و اضحي بيها مكتوب عليا حبك بس اللي مش مكتوب ان ابقى ليكي ... !! |
موهوم
كل ما نوصل لحل و اقول رجوعنا محتمل الاقيك بتكتب فـ النهايه ارجع و اقول مافيش امل هنساك و انا قادر ابعد و لو فاكر هموت بعدك اكيد موهوم ازاي اعيش ثانيه لعيون كانت خاينه و قلبي بحبها محروم انت ليه عايز تعيش انسان اناني فـ قلبه مافيش رحمه و كل الناس عنده حبة بشر ماتساويش |
حلم و حقيقه
يا حلمي اللي ساكن عيون الاماني يا كلمة غرام بتسكن كياني بحبك و حبك سبيل للحياه و قلبي فـ قربك طريقه التقاه يا صافيه و بريئه يا فرح السنين يا حلم و حقيقه و نسمة حنين بحبك يا عمري و مقدرش اعيش حياتي فـ بعدك اكيد ماتساويش بحبك و نفسي اكون بس ليكي و مهما افارق افارق و اجيكي ماددلك ايديا برقه و حنان يا سنيني اللى جايه يا كل الزمان |
لحظة الصدق
لحظة الصدق الوحيده و الاكيده كات فـ شوق صاحب دموعها و الحنين لسكة رجوعها بالأماني المستحيله لحظة الصدق الوحيده و الاكيده كات بعيده عنها لما كنت مرمي فـ حضنها كات بكل قسوه فارده جوه طيبتي كدبها و بعذابي كات سعيده فاقت .... و الثواني بتنهزم جوه ساعة دهر فات فاقت و حاولت تعتذر بس اعتذارها قابله انكسارها لما حبي ليها مات بقت مجرد ذكريات و كلمتين كره فـ قصيده |
تحت الصفر
رغم كوني لسه قادر ع الكلام لكني فضلت السكوت و بعيش فـ سجني جوه ذاتي متربص لحظة مماتي يمكن اقدر اعيش حياتي بعد ما ارحل او اموت مابقاش فاضل لي حد بعدك غير ليالي حزن غالب حتى بنك الفرح لما ابتسم لي ابتسم لي بحزن كاتب الرصيد كبير و سالب تحت صفر اليأس عايش فـ جنة العذاب وحيد و الامل مجدافه بايش و انتي شارده هناك بعيد لملمي شباكك و عودي حسسيني لحظه بوجودي ده انا جوه حضنك بالتقيني طفل عاشق للصعود فوق كيان فرحك يا غاليه مهما تِعاني بردو عاليه رايتك فوق كل الوجود |
مالكش الا هي
تِعافر .. تِسافر تِشُق البحور مالكش الا هيَّ عيونها البَهيّه تِزينك بِنور تِخاصِم .. تِسامح تِقلب ملامح وشك تلاقي مَدَّه التلاقي بينك و بينها جسور و جسور هيَّ الحقيقه و هيَّ السراب هيَّ السما لِحد التراب ماليها الشموخ بدونها تِدوخ و عقلك يبور صحيح ليلها غالب ارجع و عاتب شموسها الحزينه قمرها اللي كاتب مُغلق لحين .. ما العتمه تغور ارسم طموحَك ويّا طموحها انسى جروحك و طيّب جراحها خليك صَبور دا مهما تِقاسي فيها هتلقى حاجات مستحيل تِلقاها فـ غيرها و رَبَك ساترها ليوم القيامه مهما الزمن عليها يجور |
حُبِك ما انتهاش
لسه حُبِك ما انتهاش و ذكرياتنا متبته جوا نن قلب عاش طيف حياه متشتته لسه فيه مليون طريقه نِشفي بيها جرحنا بُصي شوفي كام حقيقه اتبنت فوق حبنا ليه نِسَلم للفراق و نعيش سنين مُر و عذاب لو صحيح بينا اشتياق نقدر نرجع حب غاب افردي قلوعِك و ضُمي مركبي الغرقانه فيكي انا مِنِك و انتي مني و الحياه تحلا فـ عينيكي |
يادوب كومبارس
و ينام البحر فـ عيونك و انا الغرقان و شوق يتوضى بدموعك و انا الولهان و يغرب قمرى عن ليلي و يندهلك و تشرق شمسي فـ غروبك و بين يدك و انا حيران و انا نفسي باسيب نفسي و الاقيني ساكن نفسك و اعيش فـ حياتي بالعافيه يادوب كومبارس بلا معنى ولا عنوان و بحلم ... لكن احلامي بتخوني و تتحقق كده ليكي و اشوف بكره يادوب فكره بتلمع بس فـ عينيكي و انا بعاني مع الحرمان و بتعكز على منايا و بترجاكي بكفايه انا غلطان ماكانش فـ بالى لما ابعد اتوه عنك اتشتت و اعيش متهان ماليش غيرك وطن ولا دار و من غيرك عايش محتار مابين يأسي و بين ذلي و بندهلك وباحتاج لك تضميني يا بحر حنان |
أشعار حلوة من أحلى عضو في المنتدى إيه الحلاوة دي ياأحمد الله ينور عليك
|
|
|
|
|
|
طريق_حُبِك
طريق حُبِك مالوش اول ولا آخر و انا حاير مانيش عارف غريق وللا على مرسى شهيد وللا ماليش جنه عايش عابر سبيل يمكن ضعيف و انا بيكي بستقوى مادد عيني لاخر الشوف و مش شايفِك ماليش فـ طريقِك الا الخوف لكن عايزك طريق حُبِك برغم الشوك انا همشيه انا م الشوق اوي ميِّت و فيكي تملي مش بلاقيه يا مغصوبه على حُبي يا معصوبه العينين فُكي غشاوتهم انا عمرى ما غشيتهم و كنت بريء و الــ 1000 ــف صديق فـ وقت الضيق بيضحكلِك طريق حُبِك بينساني .. و ينسى جموح خطاويا و روح لطموح كانت فيا شايلهالِك لكن برضو هعيش ليكي و مهما تزيدي فـي قساوتِك تزيدي برضو فـي غلاوتِك و اموت فيكي |
شكراااااااااااااااااااااااااااااااااا
|
| الساعة الآن 04:19 AM. |
Powered by vBulletin Version 3.8.12 by vBS
Copyright ©2000 - 2026, Jelsoft Enterprises Ltd
دعم فني
جميع الحقوق محفوظة لـ منتديات الكندي للتدريب والإستشارات المالية -